Psa 115 | MMX | STEP | O Leeme Silok, ik mokso do limixin dina xip aurut laasen taram, la ixok mokso do dina xip aurut levenasen atnama, ketla nenu xusuk mun u epovo ri lok ka leemi asu, mumu labalamu lexen taram la uk lox epovo amisik levelinga ram.

Psalms 115

Legesa Moroa Ruturun Mene

1 O Leeme Silok, ik mokso do limixin dina xip aurut laasen taram, la ixok mokso do dina xip aurut levenasen atnama, ketla nenu xusuk mun u epovo ri lok ka leemi asu, mumu labalamu lexen taram la uk lox epovo amisik levelinga ram.

2 Tila ba la larabung mixin di sue nama do, “Ua nga no ne Moroa atnimi?” 3 Moroa atdik ik lok toxun pana at laxalibet, la neni ik lok lempanga sala i neni i momo min. 4 Levenmoroa atdi di lox i mi lisiliva la gol, la di lok mun i mi levengkikngen di. 5 Levenngusno mo atdi, ketla dixo epovo na paase; lengkatli mo atdi, ketla dixo epovo ti reven. 6 Levenbaalung mo atdi, ketla dixo epovo nang tonga; levenisna mo atdi, ketla dixo epovo nam sumak. 7 Levengkikngen mo atdi, ketla dixo epovo na suma xisip; lengkangkedek mo atdi, ketla dixo epovo nat pas kopla dina lok gusugus. 8 Naba lox avukat do nedi di vop na laxampoovo vanga eburu bok minedi di nuunu saga atdi, dinaba vee voovo vanga bok.

9 Nemi limixin me Israel, mina nuunu saga mun at Leeme Silok; neni mun laradi loklok tooro la lenban bok atnimi. 10 Nemi bok lavamaasa at ne Moroa, mina nuunu saga at Leeme Silok; neni mun laradi loklok tooro la lenban bok atnimi. 11 La nemi mi lotu saparap Leeme Silok, mina nuunu saga ren; neni laradi loklok tooro la neni bok lenban atnimi.

12 Leeme Silok im doma dik, la neni xa naba lox anarong dik. Neni naba lox anarong limixin me Israel, la naba lox anarong bok nedi lavamaasa at ne Moroa. 13 Neni naba lox anarong bok nedi di lok ngangao aleng teren, nedi limixin amgomgo la nedi limixin gamasa.

14 A sing Leeme Silok do na raba nemi mi taxamdak mi taxaalik, tinemi eburu bok mi livipisik li atnimi. 15 A sing Leeme Silok kusu na lox anarong nemi; neni Laradi Runtudum Li at laxalibet mi lavatkangka.

16 Laxalibet, neni at Leeme Silok kusuk mun, ketla neni ga raba lavatkangka ri limixin. 17 Luvuttadi dira met pam, dixo epovo kusu dina emi asu mi Leeme Silok, kopla nedi dirat pas pam uto Katimun. 18 Ketla nedik limixin, move ata rooro, ata tong aorong ti Leeme Silok, mo nga la amisik kopmen taxavaxap teren.

Ata emi asu mi Leeme Silok.